繼之前係機場玩過兩次之後，等左咁耐…合味道工作坊終於返嚟啦！
今次變身成為首個日本以外同埋全球第三個合味道紀念館 - 合味道紀念館香港，除左以主題「安藤百福創造力之旅」為主題展覽區同打卡位之外，仲有小小豬最期待全球獨家限定嘅「榖物麥片工作坊」同埋佢玩完又想再玩嘅「出前一丁工作坊」同「我的合味道工作坊」。
「榖物麥片工作坊」先由清仔以投射形式介紹穀物麥片嘅製作過程，當中配合小遊戲互動，所以小小豬都睇得不知幾興奮。之後就創作屬於自己嘅榖物麥片杯同埋啱口味嘅配料。
「我的合味道工作坊」小小豬之前係機場玩過一次，不過今次大個仔左，所以聽得明姐姐講解嘅安藤百福先生嘅「逆向思維」，而且全程都係自己杯麵自己整，仲整左一個送俾鐘意食海鮮味杯麵嘅Daddy添。
「出前一丁工作坊」依個可以話係小小豬最…最….最期待嘅，佢之前係機場玩過兩次，由麵團開始全親手做成一包出前一丁，望見個完成品都真係好有成功感。今次我地先嚟一個簡單體驗版，雖然係咁但小小豬一樣做得落力，睇見佢攪攪個麵團都真係好好笑，到正式開嘅時候一定買飛嚟玩過呀！(不過由於嚴格控制人流及確保現場環境衛生安全，所以工作坊會係四月中先正式開放)
「安藤百福創造力之旅」紀錄日清食品創辦人安藤百福先生食品創新之旅，唔睇都唔知，原來係太空都有得食拉麵。仲有個杯麵場同埋大杯麵，記得要打卡啦！
【合味道紀念館香港】
地點： 尖沙咀中港城2樓26-35號
開放時間： 逢星期一、二、四、日：上午11時15分至下午8時15分
逢星期五、六及公眾假期：上午11時15分至下午9時15分
逢星期三：休館
記得要預先網上預約參加工作坊同了解各活動收費及限制呀 ~>www.cupnoodles-museum.com.hk
Special Thanks
#合味道紀念館香港
Search